រាជរដ្ឋាភិបាលនឹងចាត់វិធានការចំពោះការបង្កើតចលនាខុសច្បាប់ណាមួយដែលធ្វើឲ្យអស្ថេរភាព
26-June-2016 | ដោយ មែន កំសត់
ភ្នំពេញ៖ រាជរដ្ឋាភិបាលកម្ពុជាបានព្រមាននឹងចាត់វិធានការផ្លូវច្បាប់ចំពោះ ការបង្កើតចលនាខុសច្បាប់ណាមួយដែលធ្វើឲ្យប៉ះពាល់ដល់ស្ថេរភាព នៅក្នុងសង្គម។ ការព្រមានចាត់វិធានការនេះបានធ្វើឡើងបន្ទាប់ពីលោកសម រង្ស៊ីបាននិយាយពីការបង្កើតចលនាតស៊ូរំដោះប្រទេសជាតិនៅក្រៅប្រទស ។
លោកទិត សុធា អ្នកនាំពាក្យអង្គភាពព័ត៌មាននិងប្រតិកម្មរហ័ស នៃទីស្តីការគណៈរដ្ឋមន្ត្រី បានមានប្រសាសន៍ប្រាប់រស្មីកម្ពុជា កាលពីរសៀលថ្ងៃទី២៥ ខែមិថុនាឲ្យដឹងថា ពាក្យថា ចលនាតស៊ូរំដោះប្រទេស គឺពាក្យប្រឌិតបំផ្លើសនិងមួលស្ថានភាពពិតនៅក្នុងប្រទេសកម្ពុជា នៅកម្ពុជាអត់មានវិបត្តិណាដែលត្រូវមករំដោះទេពីព្រោះប្រជាពលរដ្ឋ កម្ពុជាទូទៅបាននឹងកំពុងរស់នៅជាមួយសុខសន្តិភាព ជាមួយនិងស្ថេរភាពនយោបាយ ហើយប្រជាពលរដ្ឋទាំងអស់បានកំពុងតែប្រកបមុខរបបជាប្រក្រតី បានន័យថា មិនមានស្ថានការណ៍ណាមួយដែលប្រទេសជាតិកំពុងតែធ្លាក់នៅក្នុង គ្រោះថ្នាក់ ត្រូវការរំដោះទេ។ ប៉ុន្តែវាមានតែអ្នកនយោបាយដែលកំពុងតែជាប់ទោសទណ្ឌកំពុងតែមាន រឿងរ៉ាវប្រឈមមុខនឹងផ្លូវច្បាប់ហើយបង្កើតស្ថានការណ៍ដើម្បីបំភ្លៃ សភាពការណ៍ និងបោកប្រាស់មតិអន្តរជាតិ ជាលេសនយោបាយរបស់ពួកគេ ដែលប្រឈមចំពោះមុខច្បាស់តែប៉ុណ្ណឹងទេ។
លោកបានបន្តថា យុទ្ធនាការនេះ គឺជាយុទ្ធនាការបំភ័ន្តសាធារណៈមតិ និងជាចរិតរបស់គណបក្សប្រឆាំងដែលទាល់ច្រកតែងតែរិះរកវិធីសព្វ គ្រប់បែបយ៉ាងដើម្បីដាក់សំពាធមកលើរដ្ឋាភិបាល។ ប៉ុន្តែរដ្ឋាភិបាលបាននឹងកំពុងតែដំណើរការប្រក្រតីរបស់ខ្លួន ហើយមិនស្ថិតនៅក្រោមការគាបសង្កត់ពីឥទ្ធិពលណាមួយនោះទេ។
ទាក់ទងការបង្កើតចលនាតស៊ូរំដោះប្រទេសជាតិ ត្រូវបានអ្នកនាំពាក្យអង្គភាពព័ត៌មាននិងប្រតិកម្មរហ័សនៃទីស្តីការ គណៈរដ្ឋមន្ត្រី បញ្ជាក់ថា “គេអាចធ្វើសកម្មភាពទាំងឡាយបានជាសិទ្ធិសេរីភាពនៅក្នុងការ បញ្ចេញមតិក៏ប៉ុន្តែបើសិនជាការប្រើប្រាស់សិទ្ធិសេរីភាពនោះ វាប៉ះពាល់ដល់ស្ថេរភាពនៅក្នុងសង្គមដោយសារសកម្មភាពរបស់គេបង្កើតឡើង ធ្វើសកម្មភាពណាមួយដែលវារំលោភលើផ្លូវច្បាប់ ដែលជារដ្ឋអធិបតេយ្យរបស់កម្ពុជា គឺវិធានការច្បាប់នឹងត្រូវយកមកអនុវត្ត”។
លោកបាន បញ្ជាក់ទៀតថា ប្រទេសជាតិបានរំដោះហើយ ពីរបបប៉ុល ពត អត់មានស្ថិតនៅក្នុងអាណានិគម ការត្រួតត្រាពីប្រទេសណាមួយមកលើអធិបតេយ្យរបស់កម្ពុជាទេ កម្ពុជាខ្លួនឯងជាម្ចាស់ជោគវាសនាខ្លួនឯងហើយបានធ្វើឡើងតាមរយៈការបោះ ឆ្នោតតាមបែបប្រជាធិបតេយ្យ សេរីពហុបក្ស ស្ថាប័នរដ្ឋដំណើរការជាប្រក្រតី ទាំងស្ថាប័នររដ្ឋសភា រាជរដ្ឋាភិបាល និងតុលាការ វាអត់មានអីដែលវាអាក់ប្រក្រតីភាពនោះទេ អីចឹងវាអត់មានត្រូវការរំដោះពីព្រោះយើងបានរំដោះពីរបបវាលពិឃាត រហូតដល់មករស់នៅជាមួយនិងសុខសន្តិភាព និងប្រជាធិបតេយ្យ ហើយយកច្បាប់ទម្លាប់កំពុងតែដំណើរការប្រក្រតី។
ហើយអ្វីដែល គេនិយាយថា មករំដោះប្រទេសជាតិ មិនដឹងបានន័យថាម៉េចទេ យើងអត់យល់គេប្រុងបើកយុទ្ធនាការរំដោះអ្នកទោសជាង ប៉ុន្តែការរំដោះអ្នកទោស គឺប្រឈមមុខជាមួយនឹងផ្លូវច្បាប់ ពីព្រោះអ្នកទោស អ្នកពាក់ព័ន្ធអស់ទាំងនោះគឺសុទ្ធតែប្រព្រឹត្តបទល្មើសព្រហ្មទណ្ឌ អីចឹងកុំបំភ័ន្ត យកពាក្យររំដោះប្រទេសជាតិ ដើម្បីជាចេតនាមួយ រំលោភច្បាប់ណាមួយដើម្បីរំដោះអ្នកទោសវាមិនអាចទៅរួច៕
ចំនួនអ្នកទស្សនា
- ថ្ងៃនេះ3701
- ម្សិលមិញ4911
- សប្តាហ៍នេះ21271
- ខែនេះ3701
- ឆ្នាំនេះ246941
- សរុប20689397