រឿងចាក់ក្រឡេក សម្តេចតេជោចោទសួរថា តើអ្នកចាក់ក្រឡេកនិងអ្នកភ្ញាក់ នរណាខុស ?
02-July-2016 | ដោយ មែន កំសត់
រាជធានីភ្នំពេញ ៖ ប្រតិកម្មខ្លាំងៗរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា កាលពីពេលថ្មីៗ ដែលសាធារណមតិមើលឃើញថា ជាការ «បាញ់» ទៅលើលោក កឹម សុខា ដែលពេលនេះជាប្រធានស្តីទីគណបក្សសង្គ្រោះជាតិ ដោយសម្តីធ្ងន់ៗនោះ ត្រូវបានសម្តេចតេជោបកស្រាយក្នុងសង្កថា កាលពីព្រឹកថ្ងៃទី១ កក្កដា ក្នុងឱកាសដែលសម្តេចបានអញ្ជើញជាអធិបតីក្នុងទិវាមច្ឆជាតិនៅអាង ទឹកអន្លង់ជ្រៃ ភូមិអន្លង់ជ្រៃ ឃុំប្រាំបីមុំ ស្រុកថ្ពង ខេត្តកំពង់ស្ពឺ ។
សម្តេចតេជោពន្យល់ពីការថ្លែងទៅកាន់លោក កឹម សុខា ដោយមិនចំឈ្មោះថា ខ្ញុំសូមផ្តាំលោក ខ្ញុំមើលរ៉យទ័រដែលសម្ភាសន៍គេថាលោក ហ៊ុន សែន ភ័យអាអ្នកនៅកន្លែងអា៤ជ្រុង ។ ចេញមក មិនទាន់ដល់ម៉ោងទេ លោកឯងថា លោក ហ៊ុន សែន ភ័យខ្លាចចាញ់ឆ្នោត តែសុំផ្តាំទៅលោកឯង ជាប់គុកមិនមានថ្ងៃចេញរួចទេ អាគុកកុំព្រហើនណា៎! ។
សម្តេចតេជោបានលើកឧទាហរណ៍ដោយយកលោកឧបនាយករដ្ឋមន្ត្រី យឹម ឆៃលី និងលោកទេសរដ្ឋមន្ត្រី ច័ន្ទ សារុន ។ លោកឧបនាយករដ្ឋមន្ត្រីទៅចាក់ក្រឡេកលោកទេសរដ្ឋមន្ត្រី រួចក៏ភ្ញាក់វាសដៃមកបាក់ធ្មេញ...។ សម្តេចសួរថា តើអ្នកចាក់ក្រឡេកខុស ឬក៏អ្នកភ្ញាក់ជាអ្នកខុស។ ចម្លើយ អ្នកចាក់ក្រឡេកជាអ្នកខុស (កត់ត្រាមួយ) ។
សម្ដេចលើកឧទាហរណ៍មួយទៀតៈ មនុស្សពីរនាក់កំពុងតែដើរស្ងៀមស្ងាត់ ម្នាក់ឃើញម្នាក់ដើរហើយបានថ្លែងថា ឯងជិតងាប់ហើយ។ ម្នាក់ទៀតដែលដើរជាមួយឆ្លើយមកវិញ ស្អីអាគុក! សូមសួរថា តើអ្នកស្រែកថាឯងជិតងាប់ហើយ និងអ្នកដែលតបមកវិញអ្នកណាជាអ្នកខុស? គឺអ្នកញោះគេថាជិតងាប់ជាអ្នកខុស ។ កត់ត្រាមួយទៀត ។ ដូច្នេះហើយក្នុងករណីនេះកុំតែបង្កហេតុ តើអ្នកនោះគេតវ៉ាឬអី ? នេះសច្ចធម៌ ព្រោះរឿងនេះមានកើតឡើង សុខៗញោះចាក់ក្រឡេកគេដល់គេភ្ញាក់វាសដៃដល់បាក់ធ្មេញ ។ ដល់បាក់ធ្មេញដួលម្នាក់នឹងទៅដួលប៉ុន្មាននាក់ទៀតនៅព្រៃស ។ នេះហើយសុខៗទៅបង្កហេតុដល់គេភ្ញាក់មួយកម្លាំងកែងទៅ ខ្លះកែងធំ ខ្លះកែងតូច ។
សម្តេចបានលើកជាសំណួរថា មានបុរសម្នាក់មានប្រពន្ធត្រឹមត្រូវ ដល់គេចោទថា ប្រពន្ធគាត់ជាស្រីពេស្យាស្រីខូច ហើយគាត់តបតត្រឡប់ទៅវិញ តើអ្នកណាខុស ? ចម្លើយអ្នកចោទខុស ។ សូមកត់ត្រាទៀត ។ ព្រោះករណីនេះមាននៅស្រុកខ្មែរ ។ ពាក្យបូញមាត់បត់ដុំដៃនេះ កើតមានហើយ អ្នកនេះក្លែងក្លាយ អ្នកនេះអ៊ីចេះ អ្នកនោះអ៊ីចុះ មិនធ្វើខ្លួនឯងទេឱ្យគេធ្វើ ដល់ទៅទាំងអស់ទៅ វាដូច្នេះអ៊ីចឹង ។ មានគតិលោកផង មានរឿងជាក់ស្តែងផង ។ ចុះព្រះសង្ឃមិនធ្វើខ្លួនឯង ប្រើកូនសិស្ស តើមានបាបឬអត់ ? សំឡេងអ្នកចូលរួមបានឆ្លើយព្រមៗគ្នាថា «បាប» ។ ចុះតានិងដូនជីប្រើចៅឱ្យទៅយកសជីដើម្បីឱ្យចៅទៅកាច់កត្រី បាបឬអត់ ? ចម្លើយជារួមឆ្លើយថាបាប ៕
ចំនួនអ្នកទស្សនា
- ថ្ងៃនេះ3211
- ម្សិលមិញ4501
- សប្តាហ៍នេះ3211
- ខែនេះ12911
- ឆ្នាំនេះ256151
- សរុប20698607