ឈ្មួញ២នាក់នៅតែធ្វើសកម្មភាពដឹកជញ្ជូនឈើប្រណីតទៅលក់នៅស្រុកយួនតាមច្រករបៀងភ្នំក្រហម
23-July-2016 | ដោយ មែន កំសត់
សេចក្ដីរាយការណ៍ពីប្រជាពលរដ្ឋរស់នៅតាមតំបន់ព្រំដែនក្នុងភូមិ ភិ ស្រុកអូរយ៉ាដាវ ខេត្តរតនគិរី បានឲ្យដឹងថាមានឈ្មួញ២នាក់ឈ្មោះ កាំង និងឈ្មោះ ណូ នៅតែធ្វើសកម្មភាពដឹកជញ្ជូនឈើប្រណីតទ្រង់ទ្រាយធំយកទៅលក់នៅស្រុក យួនដោយគ្មានញញើតអ្វីទាំងអស់។ ឈ្មួញទាំង២នាក់នេះបានប្រើប្រាស់រថយន្តទំនើបៗជាច្រើនគ្រឿងដឹកឈើ ប្រណីតប្រភេទធ្នង់និងសុក្រំយកទៅលក់ឲ្យឈ្មួញយួនតាមច្រករបៀងភូមិ ភិ និងច្រករបៀងភ្នំក្រហម ហើយមានសមត្ថកិច្ចជួយការពារផងដែរ។ ចំណែកមេរដ្ឋបាលព្រៃឈើស្រុកអូរយ៉ាដាវ ក៏ដូចជាលោក កែប កត់ នាយខណ្ឌរដ្ឋបាលព្រៃឈើខេត្តរតនគិរី បានរក្សាភាពស្ងៀមស្ងាត់ទៅវិញ។
ប្រភពពីសកម្មជនព្រៃឈើបានឲ្យដឹងថា បច្ចុប្បន្ននេះព្រៃឈើនៅស្រុកលំផាត់ និងស្រុកអូរយ៉ាដាវ នៅតែប្រឈមនឹងការបំផ្លាញយ៉ាងពេញបន្ទុក ហើយឈើប្រណីតប្រភេទសុក្រំនិងធ្នង់ក្នុងព្រៃការពារ និងតំបន់អភិរក្សនៃស្រុកទាំង២ កំពុងប្រឈមនឹងសេចក្ដីវិនាស។ ជារៀងរាល់យប់ប្រជាពលរដ្ឋបានឃើញរថយន្តពី២០ទៅ៣០គ្រឿងម៉ាកធុនដ្រា ឡង់គ្រឺស័រ ឡិចស៊ីស វីហ្គោ និងបាឡែនជាដើម ដឹកជញ្ជូនឈើទៅស្រុកយួនតាមច្រករបៀងក្នុងភូមិភិ ដែលគ្រប់គ្រងដោយលោក សេក ឌុល ជាមេប៉ុស្ដិ៍ប្រចាំទីនេះ។ ចំណែកច្រករបៀងភ្នំក្រហម ដែលគ្រប់គ្រងដោយកម្លាំងនគរបាលវរការពារព្រំដែនលេខ៦២៣ និងកម្លាំងយោធាវរការពារព្រំដែនគោកលេខ១០២ ក៏ឈ្មួញឈ្មោះ កាំង និងឈ្មោះ ណូ ដឹកជញ្ជូនឈើចេញយ៉ាងអនាធិបតេយ្យដែរ។
ប្រភពពីមន្ត្រីអាជ្ញាធរនិងសមត្ថកិច្ចពាក់ព័ន្ធបានឲ្យដឹងថា មេបញ្ជាការនគរបាលវរការពារព្រំដែនគោកលេខ៦២៣ និងមេបញ្ជាការយោធាវរការពារព្រំដែនគោកលេខ១០២ ទំនងជាទទួលបានផលប្រយោជន៍យ៉ាងច្រើនសន្ធឹកសន្ធាប់ទើបបណ្ដោយឲ្យឈ្មួញ ឈ្មោះ កាំង និងឈ្មោះ ណូ ដឹកជញ្ជូនឈើទៅលក់នៅស្រុកយួនទ្រង់ទ្រាយធំដូចបច្ចុប្បន្ននេះ។ ប្រភពបានឲ្យដឹងទៀតថាឈ្មួញទាំង២នាក់ខាងលើនេះ គឺជាឈ្មួញដែលល្បីល្បាញខាងរកស៊ីដឹកជញ្ជូនឈើប្រណីតទៅលក់នៅស្រុក យួនច្រើនឆ្នាំមកហើយ មិនដែលមានមន្ត្រីជំនាញឬសមត្ថកិច្ចពាក់ព័ន្ធណា ចាត់វិធានការបង្ក្រាបនោះឡើយ។ សូម្បីតែនៅក្នុងដំណាក់ការដែលលោកនាយករដ្ឋមន្ត្រី ហ៊ុន សែន ចេញបទបញ្ជាឲ្យទប់ស្កាត់បទល្មើសរត់ពន្ធឈើប្រណីតទៅស្រុកយួន ក៏ឈ្មួញឈ្មោះ កាំង និងឈ្មោះ ណូ អាចដឹកជញ្ជូនឈើខុសច្បាប់ទៅលក់នៅស្រុកយួនយ៉ាងរលូនដែរ៕
ចំនួនអ្នកទស្សនា
- ថ្ងៃនេះ1951
- ម្សិលមិញ5181
- សប្តាហ៍នេះ24711
- ខែនេះ7141
- ឆ្នាំនេះ250381
- សរុប20692837