កុងត្រូលជជុះ ល្បែងស៊ីសង និងបទល្មើសឆ្លងដែនរាលដាលយ៉ាងពេញបន្ទុកក្នុងខេត្តបាត់ដំបង
28-July-2016 | ដោយ មែន កំសត់
ប្រជាពលរដ្ឋក្នុងខេត្តបាត់ដំបង មួយចំនួនមានការហួសចិត្តយ៉ាងខ្លាំងនៅពេលឮលោកនាយករដ្ឋមន្ត្រី ហ៊ុន សែន សរសើរលោក ច័ន្ទ សុផល អភិបាលខេត្តបាត់ដំបងថាជាមន្ត្រីល្អ ព្រោះជាក់ស្ដែងល្បែងស៊ីសង គ្រឿងញៀន កុងត្រូលជជុះ និងបទល្មើសឆ្លងដែន ព្រមទាំងជម្លោះដីធ្លីក្នុងខេត្តបាត់ដំបង កំពុងរាលដាលយ៉ាងពេញបន្ទុក។ តាមការអះអាងរបស់ប្រជាពលរដ្ឋខេត្តបាត់ដំបង បានឲ្យដឹងថាតាមដងផ្លូវពីស្រុកសំឡូត ទៅស្រុកបាណន់ មានកុងត្រូលជជុះជាង១០កន្លែងចាំជំរិតយកលុយពីអ្នករកស៊ីដឹកអុសដឹក ធ្យូង និងដឹកកសិផលផ្សេងៗតាមអំពើចិត្ត។ ដូច្នេះក្រសួង គួរពិនិត្យមើលបញ្ហានេះផងមុនពេលសរសើរលោក ច័ន្ទ សុផល អភិបាលខេត្តបាត់ដំបង ដែលជាមនុស្សអសមត្ថភាពថាជាមនុស្សល្អ ព្រោះប្រជាពលរដ្ឋអស់សំណើចយ៉ាងខ្លាំង។
ប្រភពពីប្រជាពលរដ្ឋនិងមន្ត្រីរាជការមួយចំនួនក្នុងខេត្តបាត់ដំបង បានឲ្យដឹងថាក្រោយពេលមានការផ្លាស់ប្ដូរលោក ប៉ាង ហៀង មកធ្វើជាអធិការនគរបាលក្រុងបាត់ដំបង ជំនួសលោក យឹម វិចិត្រ ដែលត្រូវដកហូតពីតំណែងនោះ គឺល្បែងស៊ីសង និងបទល្មើសផ្សេងៗនៅតែរាលដាលយ៉ាងពេញបន្ទុកគួរឲ្យព្រួយបារម្ភ។ ប្រភពបានឲ្យដឹងថា ល្បែងភ្នាល់ទឹកភ្លៀង ល្បែងកន្ទុយលេខ បញ្ជល់មាន់ និងភ្នាល់បាល់ទាត់ជាដើម នៅតែរាលដាលឥតឈប់ឈរនាំឲ្យប៉ះពាល់យ៉ាងខ្លាំងដល់សន្តិសុខសង្គម។ ជាងនេះទៅទៀតបទល្មើសចែកចាយជួញដូរនិងប្រើប្រាស់គ្រឿងញៀនក្នុងក្រុង បាត់ដំបង ក៏ដូចជាតាមបណ្ដាខេត្តមួយចំនួន សមត្ថកិច្ចនគរបាលនិងកងរាជអាវុធហត្ថបង្ក្រាបមិនចេះអស់ឡើយ ដែលជាហេតុធ្វើឲ្យប្រជាពលរដ្ឋព្រួយបារម្ភកាន់តែខ្លាំងឡើងៗពីបញ្ហា អសន្តិសុខសង្គម។
ចំណែកប្រជាពលរដ្ឋរស់នៅតាមតំបន់ព្រំដែនក្នុងស្រុកកំរៀង ស្រុកភ្នំព្រឹក និងស្រុកសំពៅលូន បានឲ្យដឹងថាបទល្មើសនាំចូលទំនិញគេចពន្ធ ទំនិញខូចគុណភាព គ្រឿងឧបភោគបរិភោគមានផ្ទុកសារធាតុគីមីដូចជា ត្រី សាច់ជ្រូក សាច់មាន់ ឆ្អឹងមាន់ និងប្រហិតជាដើម នៅតែបន្តកើតឡើងយ៉ាងគគ្រឹកគគ្រេងដោយសារមានការបើកដៃពីសមត្ថកិច្ច ពុករលួយ។ ជាងនេះទៅទៀតសមត្ថកិច្ចតាមច្រករបៀងមួយចំនួនក្នុងស្រុកភ្នំព្រឹក ស្រុកសំពៅលូន និងស្រុកកំរៀង បានបើកដៃឲ្យពលករខ្មែរឆ្លងដែនខុសច្បាប់ទៅរកការងារធ្វើលើទឹកដីសៀម យ៉ាងពេញបន្ទុកដដែល។ ចំណែករឿងរ៉ាវជម្លោះដីធ្លីនៅស្រុករតនមណ្ឌល ស្រុកគាស់ក្រឡ និងស្រុកបវេលជាដើម នៅតែមិនទាន់ដោះស្រាយចប់សព្វគ្រប់នៅឡើយធ្វើឲ្យប្រជាពលរដ្ឋប្រឈមនឹង ទុក្ខវេទនាគ្មានទីបញ្ចប់។ ដូច្នេះការលើកសរសើរថាលោក ច័ន្ទ សុផល អភិបាលខេត្តបាត់ដំបងជាមន្ត្រីល្អ គឺនិយាយលែងចេញតែម្តងក្នុងខណៈដែលល្បែងស៊ីសង កុងត្រូលជជុះ បទល្មើសឆ្លងដែន និងបទល្មើសផ្សេងៗកំពុងរាលដាលយ៉ាងពេញបន្ទុកក្នុងខេត្តបាត់ដំបង៕
ចំនួនអ្នកទស្សនា
- ថ្ងៃនេះ2741
- ម្សិលមិញ4901
- សប្តាហ៍នេះ21051
- ខែនេះ175261
- ឆ្នាំនេះ777441
- សរុប21219897