មេក្លោងបំផ្លាញព្រៃឈើរាប់ពាន់ហិកតានៅខេត្តមណ្ឌលគិរី អាចធ្វើអ្វីៗតាមអំពើចិត្ត
28-July-2016 | ដោយ មែន កំសត់
មន្ត្រីអង្គការក្រៅរដ្ឋាភិបាលនិងប្រជាសហគមន៍ការពារព្រៃឈើក្នុង ខេត្តមណ្ឌលគិរី បានឲ្យដឹងថាឈ្មោះ កែវ វុទ្ធី ដែលជាមេក្លោងបំផ្លាញព្រៃឈើរាប់ពាន់ហិកតានៅស្រុកកោះញែក ខេត្តមណ្ឌលគិរីនោះ មិនទាន់ត្រូវបានមន្ត្រីអាជ្ញាធរ និងសមត្ថកិច្ចចាត់វិធានការតាមច្បាប់ឡើយ។ ទន្ទឹមនឹងនេះប្រជាពលរដ្ឋក្នុងឃុំរយ៉ ស្រុកកោះញែក បានបង្ហាញនូវការសង្ស័យថា ប្រសិនបើគ្មានការបើកដៃពីសំណាក់មេឃុំនិងអភិបាលស្រុកទេនោះ គឺឈ្មួញឈ្មោះ កែវ វុទ្ធី និងបក្ខពួកមិនអាចធ្វើអ្វីៗតាមអំពើចិត្តបានឡើយ។ ដូច្នេះលោក ស្វាយ សំអ៊ាង អភិបាលខេត្តមណ្ឌលគិរី និងសមត្ថកិច្ចខេត្តមណ្ឌលគិរី គួរចាត់វិធានការតាមច្បាប់ទៅលើឈ្មួញឈ្មោះ កែវ វុទ្ធី និងបក្ខពួកជាបន្ទាន់ ព្រោះការបំផ្លាញព្រៃឈើរាប់ពាន់ហិកតាមិនមែនជារឿងតូចតាចទេ។
ជុំវិញបញ្ហាខាងលើនេះដែរ ពលរដ្ឋខ្មែរឥស្លាមប្រមាណជាង២០០គ្រួសារដែលត្រូវអាជ្ញាធរខេត្ត មណ្ឌលគិរី បណ្ដេញចេញពីលំនៅដ្ឋានដោយចោទថា រស់នៅលើដីរដ្ឋខុសច្បាប់កាលពីពេលកន្លងមកបានប្ដឹងឈ្មួញឈ្មោះ កែវ វុទ្ធី ពីបទឆបោក។ ដោយហេតុថាឈ្មោះ កែវ វុទ្ធី និងបក្ខពួកបានអូសទាញពួកគាត់ឲ្យទៅកាប់ទន្ទ្រាននិងរស់នៅលើដីព្រៃ នៅតំបន់ព្រៃភ្នំខៀវ ភូមិរវ៉ាក់ ឃុំរយ៉ ស្រុកកោះញែក ហើយពួកគាត់បានបង់លុយទៅឲ្យឈ្មោះ កែវ វុទ្ធី និងបក្ខពួកតាមការកំណត់។ ប៉ុន្តែក្រោយមកមន្ត្រីអាជ្ញាធរបានបណ្ដេញពួកគាត់ចេញពីដីនោះ និងរុះរើផ្ទះសម្បែងដោយចោទថារស់នៅលើដីរដ្ឋខុសច្បាប់ ដូច្នេះទើបពួកគាត់ប្ដឹងឈ្មោះ កែវ វុទ្ធី និងបក្ខពួកពីបទឆបោក។
តាមរយៈពាក្យបណ្ដឹងនេះប្រជាពលរដ្ឋរងគ្រោះសង្ឃឹមថា សមត្ថកិច្ចខេត្តមណ្ឌលគិរី នឹងដោះស្រាយជូនពួកគាត់ជាមិនខាន ម្យ៉ាងទៀតអាជ្ញាធរខេត្តមណ្ឌលគិរី ក៏ត្រូវចាត់វិធានការតាមច្បាប់ទៅលើឈ្មោះ កែវ វុទ្ធី ដែលបំផ្លាញព្រៃឈើក្នុងស្រុកកោះញែក រាប់ពាន់ហិកតាផងដែរ។ ទន្ទឹមនឹងនេះក្រសួងក៏ដូចជាស្ថាប័នពាក់ព័ន្ធនានា ត្រូវចាត់វិធានការជាបន្ទាន់ទៅលើមន្ត្រីអាជ្ញាធរ មន្ត្រីជំនាញ និងសមត្ថកិច្ចក្នុងស្រុកកោះញែក ដែលជាប់ពាក់ព័ន្ធនឹងបទល្មើសបំផ្លាញព្រៃឈើជាមួយឈ្មោះ កែវ វុទ្ធី ព្រោះបើគ្មានការឃុបឃិតជាប្រព័ន្ធទេ គឺឈ្មោះ កែវ វុទ្ធី និងបក្ខពួកមិនអាចធ្វើអ្វីៗតាមអំពើចិត្តបានឡើយ។ មានន័យថាមន្ត្រីរដ្ឋបាលព្រៃឈើស្រុកកោះញែក មន្ត្រីអាជ្ញាធរឃុំរយ៉ និងអភិបាលស្រុកកោះញែក អាចជាប់ពាក់ព័ន្ធទៅនឹងសកម្មភាពបំផ្លាញព្រៃឈើរបស់ឈ្មោះ កែវ វុទ្ធី និងបក្ខពួក ដូច្នេះក្រសួងនិងស្ថាប័នពាក់ព័ន្ធ ត្រូវស៊ើបអង្កេតឲ្យបានច្បាស់លាស់៕
ចំនួនអ្នកទស្សនា
- ថ្ងៃនេះ2631
- ម្សិលមិញ4901
- សប្តាហ៍នេះ20941
- ខែនេះ175151
- ឆ្នាំនេះ777331
- សរុប21219787