សម្ដេចតេជោថា មិនអាចខន្ដីចំពោះមនុស្សខូចទៀតទេ តែមិនប្រើហិង្សា
02-August-2016 | ដោយ មែន កំសត់
ភ្នំពេញ ៖សម្ដេចអគ្គមហាសេនាបតីតេជោហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា បានលើកឡើងថា សម្ដេចមិនអាចខន្ដីបានទៀតទេ ចំពោះអ្នកនយោបាយមួយចំនួនដែលមានគំនិតមិនល្អ និងមួលបង្កាច់សម្ដេច។ ការបញ្ជាក់បែបនេះ គឺត្រូវបានធ្វើឡើងក្នុងឱកាសដែលសម្ដេចបានអញ្ជើញជាអធិបតី ក្នុងពិធីសម្ពោធដាក់ឱ្យប្រើប្រាស់ផ្លូវជាតិលេខ៤៤ ក្នុងខេត្តកំពុងស្ពឺ នាព្រឹកថ្ងៃទី២ ខែសីហា ឆ្នាំ២០១៦ នេះ។
សម្ដេចតេជោបានបញ្ជាក់ថា កន្លងមកសម្ដេចធ្លាប់បានខន្ដីជាច្រើនលើកច្រើនសារមកហើយ ចំពោះបុគ្គលនិងអ្នកនយោបាយមួយចំនួន ដែលមានចេតនាចង់បង្កាច់បង្ខូចសម្ដេច។ប៉ុន្តែដោយសារតែទង្វើនោះ វាធ្ងន់ធ្ងរពេក ដែលមិនអាចទ្រាំទ្របាន ទើបសម្ដេចអស់ខន្ដី “...យើងអត់មានជម្រើសទេ...ប៉ុន្តែយើងមិនប្រើហិង្សាទេ... ប្រព័ន្ធតុលាការគឺជារឿងចាំបាច់ ដែលត្រូវដោះស្រាយបញ្ហា ព្រោះប្រទេសយើងជាប្រទេសដែលមានច្បាប់ គេធ្វើតុលាការគឺសម្រាប់កាត់សេចក្ដី អ្នកណាខុស អ្នកណាត្រូវ...”។
ក្នុងន័យនេះ សម្ដេចក៏បានប្រៀបធៀបទៅនឹងការលេងអុកថា “...ចឹងទេ អ្នកដែលចង់អុកខ្ញុំករុណាខ្ញុំ តែងតែគ្រោះថ្នាក់ខ្លួនឯងវិញទេ...មនុស្សមួយចំនួនអុកខ្ញុំករុណា ខ្ញុំហើយខ្ញុំអុកចូលតុលាការវិញបាត់ហើយ...”។
ការលើកឡើង របស់ប្រមុខដឹកនាំគណបក្សកាន់អំណាចបែបនេះ ហាក់ជាការសំដៅដល់មន្ត្រីគណបក្សប្រឆាំង ដែលមានលោកសម រង្ស៊ី ប្រធានគណបក្ស និងលោកស្រីថាក់ ឡានី សមាជិកព្រឹទ្ធសភាមកគណបក្សសម រង្ស៊ី ដែលបានចោទប្រកាន់រដ្ឋាភិបាល និងសម្ដេចតេជោថានៅពីក្រោយខ្នងឃាតកម្មលើលោកបណ្ឌិតកែម ឡី។
ជាមួយគ្នានេះដែរ កាលពីថ្ងៃទី១ខែសីហា តាមរយៈតាមរយៈ លោក គី តិច មេធាវីជំនួសមុខឱ្យដើមបណ្តឹង សម្ដេចតេជោហ៊ុន សែន បានប្តឹងទាមទារសំណងជំងឺចិត្ត ម្នាក់មួយរយរៀល ពីលោកសម រង្ស៊ីប្រធានបក្សសង្គ្រោះជាតិ និងលោកស្រីថាក់ ឡានី បាន សុំឱ្យតុលាការផ្តន្ទាទោសតាមផ្លូវច្បាប់ ដែលបានធ្វើអោយប៉ះពាល់ដល់ កិត្តិយសនិងកិត្យានុភាពរបស់លោកនាយករដ្ឋមន្ត្រីកម្ពុជា៕
ចំនួនអ្នកទស្សនា
- ថ្ងៃនេះ4081
- ម្សិលមិញ4911
- សប្តាហ៍នេះ21651
- ខែនេះ4081
- ឆ្នាំនេះ247321
- សរុប20689777