រាជរដ្ឋាភិបាលសម្រេចលុបចោលរាល់ឯកសារបញ្ជាក់ជា«ពលរដ្ឋខ្មែរ»របស់ជនអន្តោប្រវេសន៍នៅកម្ពុជា,វៀតណាមមានច្រើនជាងគេ
20-August-2016 | ដោយ មែន កំសត់
ភ្នំពេញ ៖ នាយឧត្តមសេនីយ៍ សុខ ផល អគ្គនាយកនៃអគ្គនាយកដ្ឋានអន្ដោប្រវេសន៍ បានឲ្យដឹងថា រាជរដ្ឋាភិបាលកម្ពុជានឹងលុបចោលរាល់ឯកសារ និងលិខិតស្នាមផ្សេងៗបញ្ជាក់ពីភាពជា «ពលរដ្ឋខ្មែរ» ដែលត្រូវបានអាជ្ញាធរ ឬសមត្ថកិច្ចចេញឲ្យជនអន្តោប្រវេសន៍នៅកម្ពុជានាពេលកន្លងទៅ។
ថ្លែងប្រាប់ក្រុមអ្នកសារព័ត៌មាន បន្ទាប់ពីបញ្ចប់កិច្ចប្រជុំបូកសរុបរបាយការណ៍ជំហានដំបូងស្ដីពីការបន្ដការអនុវត្តន៍ការងារគ្រប់គ្រងជនអន្ដោប្រវេសន៍នៅកម្ពុជា នៅថ្ងៃទី១៩ ខែសីហា ឆ្នាំ២០១៦នេះ នាយឧត្តមសេនីយ៍ សុខ ផល បញ្ជាក់ថា ជនបរទេសអន្ដោប្រវេសន៍ដែលបានកាន់កាប់ឯកសាររដ្ឋបាល បញ្ជាក់ពីភាពជាពលរដ្ឋខ្មែរមានជិត១០ម៉ឺននាក់។
លោកបន្ដាថា ជនអន្តោប្រវេសន៍ ដែលនឹងត្រូវប្រកាសលុបចោលឯកសាររដ្ឋបាលនានានេះនឹងត្រូវឲ្យពួកគេបំពេញបែបបទជាជនអន្តោប្រវេសន៍ឡើងវិញ តែបើពួកគេមិនព្រមបំពេញឯកសារ ជាជនអន្តោប្រវេសន៍ទេ គឺអាចត្រឡប់ទៅប្រទេសដើ របស់ពួកគេវិញ។
លោក បានបញ្ជាក់យ៉ាងដូច្នេះ “...បងប្អូន ដែលកាន់កាប់ឯកសារខ្មែរនេះ យើងបានបដិសេធ ធ្វើការបដិសេធនៅថ្ងៃខាងមុខនេះ...ប៉ុន្តែយើងមិនបណ្តេញចេញជាក្រុម ជាពួកទៅប្រទេសដើមវិញទេ ព្រោះមានច្រើនសញ្ជាតិណាស់ មិនមែនតិចសញ្ជាតិទេ ប៉ុន្តែវៀតណាមច្រើនជាងគេ...អ៊ីចឹងអ្នកដែលនឹងត្រូវប្រកាសបដិសេធ នៅពេលខាងមុខនោះ គេនឹងទៅជាអ្វី... ទី១. បើអត់មានលិខិតស្នាមទេ គេអាចទៅប្រទេសដើមគេវិញ ដោយស្ម័គ្រចិត្ត ទី២. ដោយសាររស់នៅយូរហើយ គេអាចដាក់ពាក្យសុំធ្វើជាជនអន្តោប្រវេសន៍ ហើយបើគេស្ម័គ្រចិត្ត គេអាចដាក់ពាក្យសុំសញ្ជាតិខ្មែរ...”។
បើទោះបីជាយ៉ាងណា លោក សុខ ផល បន្ថែមថា ថា ការអនុវត្តន៍ច្បាប់អន្តោប្រវេសន៍ត្រូវធ្វើតាមគោលការគោរពសិទ្ធិមនុស្សដោយចាប់បញ្ជូនដោយសន្តិវិធី ដើម្បីរក្សាបាននូវកិច្ចសហប្រតិបត្តិការ និងទំនាក់ទំនងល្អជាមួយប្រទេសជិតខាង ពោលគឺមិនធ្វើដូចរបប លន់ ណុល និងរបប ប៉ុល ពត នោះឡើយ។ របបទាំងពីរនេះអនុវត្តវិធានការអន្តោប្រវេសន៍ គឺជាការកាប់សម្លាប់ ដែលមានភាពសាហាវព្រៃផ្សៃ៕
ចំនួនអ្នកទស្សនា
- ថ្ងៃនេះ2431
- ម្សិលមិញ3511
- សប្តាហ៍នេះ15081
- ខែនេះ240751
- ឆ្នាំនេះ240751
- សរុប20683207