​ភ្នំពេញ ៖  ឯកឧត្តម ឧ​ត្ត​ម​សេនីយ​ឯក មួន សារ៉ន អគ្គ​ស្នងការរង​នគរបាលជាតិ​បាន​ណែនាំ​ដល់​កងកម្លាំង​នគរបាលជាតិ ត្រូវមាន​ចំណេះដឹង​ខ្ពស់ ផ្នែក​ច្បាប់ សីលធម៌ វិទ្យាសាស្ត្រ​នគរបាល និង​ជំនាញ​ឯកទេស​នានា ដើម្បី​បម្រើ​ដល់​ប្រទេសជាតិ និង​ប្រជាជន​។​

​ការ​ថ្លែង​បែបនេះ​គ្រា​ដែល ឯកឧត្តម ឧ​ត្ត​ម​សេនីយ​ឯក មួន សារ៉ន អគ្គ​ស្នងការរង​នគរបាលជាតិ អញ្ជើញ​ជា អធិបតី​ក្នុង​ពិធី​បិទ​វគ្គ​បំប៉ន​ជំនាញ​អន្តរាគមន៍​ពិសេស ជំនាញ​ការពារ ទប់ស្កាត់ បាតុកម្ម​-​កូដកម្ម និង​ជំនាញ​សង្គ្រោះ​ទូទៅ នា​រសៀល​ថ្ងៃទី​៣០ ខែមីនា ឆ្នាំ​២០១៧ នៅ​អង្គភាព​អន្តរាគមន៍ នៃ​អគ្គស្នងការ​នគរបាល​ជាតិ​ ។​

​ឯកឧត្តម អគ្គ​ស្នងការរង​នគរបាលជាតិ ថ្លែង ​ក្រើនរំលឹក​ដល់​នគរបាល​ជាតិ​ត្រូវ​ប្រុងប្រយ័ត្ន​ជានិច្ច កុំ​ធ្វេសប្រហែស​លើ​បញ្ហា​សន្តិសុខ​របស់​ប្រទេសជាតិ ជាពិសេស​កុំ​មានការ​ធ្វេសប្រហែស​ចំពោះ​សន្តិសុខ និង​សណ្តាប់ធ្នាប់​សង្គម​។​លើសពីនេះទៀត កម្លាំង​នគរបាលជាតិ​គ​ម្បី​មាន​ភាពឈ្លាសវៃ គួបផ្សំ​សមត្ថភាព  យល់ដឹង​ខ្ពស់​ដើម្បី​ដោះស្រាយ​រាល់​បញ្ហា​ឲ្យ​ទាន់ពេលវេលា​ហេតុនេះហើយ​វគ្គ​បំប៉ន​ជំនាញ​អន្តរាគមន៍​ពិសេស ជំនាញ​ការពារ ទប់ស្កាត់ បាតុកម្ម​-​កូដកម្ម និង​ជំនាញ​សង្គ្រោះ​ទូទៅ​នេះ ពិត​ជាមាន​សារៈសំខាន់​ណាស់​ក្នុងការ​រួមចំណែក​ពង្រឹង​សមត្ថភាព​ដល់​កងកម្លាំង​នគរបាលជាតិ ពាក់ព័ន្ធ​នឹង​ជំនាញ សន្តិសុខ សុវត្ថិភាព និង​សណ្តាប់ធ្នាប់​សាធារណៈ និង​ពង្រឹង​កិច្ចសហការ​ជាមួយ​ស្ថាប័ន អង្គភាព​ពាក់ព័ន្ធ​នានា​។​

​តាម​របាយការណ៍​វគ្គ​បំប៉ន​ជំនាញ​អន្តរាគមន៍​ពិសេស ដែល​អាន​ដោយ ឯកឧត្តម ឧ​ត្ត​ម​សេនីយ៍​ឯក ចាន់ ស៊ីថា ប្រធាន​អង្គភាព​អន្តរាគមន៍ បាន​ឲ្យ​ដឹងថា វគ្គ​បំប៉ន​ដែល​បាន​បិទ​នាពេលនេះ គឺ​បាន​ដំណើរការ​ចាប់ផ្តើម​ពីថ្ងៃ​ទី​៣ ខែមករា ឆ្នាំ​២០១៧ ដែលមាន​សិក្ខាកាម​ចំនួន ៣០០​នាក់ មាន​រយៈពេល ៣​ខែ ដែលមាន​វគ្គ​ជំនាញ​អន្តរ​គម​ន៍​ពិសេស ជំនាញការ​ការពារ និង​ទប់ស្កាត់​កូដកម្ម និង​បាតុកម្ម  និង​ជំនាញ​សង្គ្រោះ​ទូទៅ ពិសេស​វគ្គ​នេះ​បាន​ផ្តោត​សំខាន់​ទៅលើ​ការអនុវត្ត​ជាក់ស្តែង​ច្រើនជាង​ការសិក្សា​ទ្រឹស្តី​ ៕

​