នគរបាលខេត្ដកណ្ដាល៣៧រូប ត្រូវបានប្រកាសផ្ទេរភារកិច្ចតែងតាំងមុខតំណែង និងបំពាក់ឋានន្ដរស័ក្កិ
15-August-2017 | ដោយ ពល បញ្ញា
កណ្ដាល ៖ ដោយមានកិច្ចគាំពារលើកទឹកចិត្ដពីសំណាក់សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ និងការយកចិត្ដទុកដាក់ពីសំណាក់ឯកឧត្ដម នាយឧត្ដមសេនីយ៍សន្ដិបណ្ឌិត នេត សាវឿន អគ្គស្នងការនគរបាលជាតិ មន្ដ្រីនគរបាលខេត្ដកណ្ដាលចំនួន៣៧រូប ត្រូវបានប្រកាសផ្ទេរភារកិច្ច តែងតាំងមុខតំណែង និងបំពាក់ឋានន្ដរស័ក្កិ ។
ពិធីប្រកាសផ្ទេរភារកិច្ច តែងតាំងមុខតំណែង និងបំពាក់ឋានន្ដរស័ក្កិធ្វើឡើង កាលពីព្រឹកថ្ងៃទី១៥ ខែសីហា ឆ្នាំ២០១៧ នៅសាលប្រជុំស្នងការដ្ឋាននគរបាលខេត្ដ ក្រោមអធិបតីភាពឯកឧត្ដម ឧត្ដមសេនីយ៍ឯក ប៉ែន វិបុល អគ្គស្នងការរងនគរបាលជាតិ និងជាប្រធាននាយកដ្ឋានបុគ្គលិកក្រសួងមហាផ្ទៃ តំណាងដ៏ខ្ពង់ខ្ពស់ឯកឧត្ដម នាយឧត្ដមសេនីយ៍សន្ដិបណ្ឌិត នេត សាវឿន អគ្គស្នងការនគរបាលជាតិ ។ ពិធីនេះដែរ ក៏មានការចូលរួមពីប្រតិភូក្រសួងមហាផ្ទៃ លោក លាវ ស្រេង ព្រះរាជ្ញាអមសាលាដំបូងខេត្ដកណ្ដាល ,លោកឧត្ដមសេនីយ៍ទោ អ៊ាវ ចំរើន ស្នងការនគរបាលខេត្ដ ,លោកស្នងការរង ,តំណាងមេបញ្ជាការកងរាជអាវុធហត្ថខេត្ដ ,តំណាងមេបញ្ជាការតំបន់សឹករងកណ្ដាល ,លោកអធិការនគរបាលក្រុង/ស្រុកទាំង១១ និងនាយប៉ុស្ដិ៍នគរបាលរដ្ឋបាលទាំង១២៧ប៉ុស្ដិ៍ផងដែរ ។
ស្នងការនគរបាលខេត្ដកណ្ដាលលោកឧត្ដមសេនីយ៍ទោ អ៊ាវ ចំរើន បានអានរបាយការណ៍ស្វាគមន៍យ៉ាងដូច្នេះថា ថ្ងៃនេះស្នងការនគរបាលខេត្ដកណ្ដាលមានសោមនស្សរីករាយបំផុតដែលឯកឧត្ដម ឧត្ដមសេនីយ៍ឯក ប៉ែន វិបុល អគ្គស្នងការរងនគរបាលជាតិនិងជាប្រធាននាយកដ្ឋានបុគ្គលិក តំណាងដ៏ខ្ពង់ខ្ពស់ ឯកឧត្ដម នាយឧត្ដមសេនីយ៍សន្ដិបណ្ឌិត នេត សាវឿន អគ្គស្នងការនគរបាលជាតិ ផ្ដល់ពេលវេលាដ៏មានតម្លៃអញ្ជើញជាអធិបតីភាព ក្នុងពិធីប្រកាសផ្ទេរភារកិច្ច តែងតាំងមុខតំណែង និងបំពាក់ឋានន្ដរស័ក្កិជូនមន្ដ្រីនគរបាលនៅថ្ងៃនេះ ។ មន្ដ្រីនគរបាលដែលត្រូវបានប្រកាសផ្ទេរភារកិច្ច តែងតាំងមុខតំណែង រូមមាន៖ ថ្នាក់នាយការិយាល័យ៣រូប ,នាយរងការិយាល័យ៦រូប ,អធិការនគរបាលស្រុក២រូប ,អធិការរងនគរបាលស្រុក៩រូប ។ ដោយឡែកមន្ដ្រីនគរបាលដែលត្រូវបានតម្លើងឋានន្ដរស័ក្កិរូមមាន៖ ថ្នាក់វរសេនីយ៍ឯក១២រូប , វរសេនីយ៍ទោ១រូប , វរសេនីយ៍ត្រី២រូប , អនុសេនីយ៍ឯក១រូប ននិងថ្នាក់អនុសេនីយ៍ទោ១រូបផងដែរ ។
បន្ទាប់ពីប្រគល់ត្រា ប្រគល់ប្រកាស និងបំពាក់ឋានន្ដរស័ក្កិជូនមន្ដ្រី ជ័យលាភីរួចមកឯកឧត្ដម ឧត្ដមសេនីយ៍ឯក ប៉ែន វិបុល អគ្គស្នងការរងនគរបាលជាតិ និងជាប្រធាននាយកដ្ឋានបុគ្គលិកបានមានប្រសាសន៍សំណេះសំណាលយ៉ាងដូច្នេះថា មន្ដ្រីនគរបាលមិនមែនឲ្យតែដល់ឆ្នាំគឺត្រូវតែតម្លើងស័ក្កិនោះទេ គឺត្រូវមើលទៅតាមតួនាទីនិងសមត្ថភាព ទើបថ្នាក់លើសម្រេចថា ឡើងដល់កម្រិតណា ។ ការផ្លាស់ប្ដូរតួនាទី គឺជារឿងធម្មតាមិនមែនជាការដាក់ពិន័យអ្វីឡើយ មន្ដ្រីនគរបាលគ្រប់រូបត្រូវទទួលបានបទពិសោធន៍ថ្មីៗ ពីមួយជំនាន់ទៅមួយជំនាន់ ។
ឯកឧត្ដមអគ្គស្នងការរងបានណែនាំដល់ លោកស្នងការ នាយការិយាល័យបុគ្គលិក និងលោកអធិការនគបាលស្រុក ត្រូវសិក្សាពីសមត្ថភាពរបស់មន្ដ្រីនគរបាលវ័យក្មេង ដើម្បីធ្វើការបណ្ដុះបណ្ដាល ឲ្យពួកគាត់មានសមត្ថភាពខ្ពស់រងចាំបន្ដវេននិងទទួលបទពិសោធន៍ជាច្រើនទៀត ។ ឯកឧត្ដមប្រធាននាយកដ្ឋានបុគ្គលិកបានបញ្ជាក់ថា មនុស្សម្នាក់ៗប្រៀបបីដូចជាគ្រាប់ពេជ្រមិនទាន់ច្នៃ ដូច្នេះយើងត្រូវសម្លឹងមើលថា មួយណាអាចយកកែច្នៃទៅជាគ្រាប់ពេជ្រដ៏ភ្លឺចែងចាំងនោះបាន ។
ជាចុងក្រោយឯកឧត្ដម ប៉ែន វិបុល បានថ្លែងកោតសរសើរដល់មន្ដ្រីនគរបាលចរាចរណ៍ដែលបានខិតខំប្រឹងប្រែងធ្វើការងារទាំងមេឃក្ដៅនិងមេឃភ្លៀង ។ ដូច្នេះត្រូវមានការលើកទឹកចិត្ដដល់ពួកគាត់ដូចជាផ្ដល់ជូនប័ណ្ណសរសើរនិងតម្លើងឋានន្ដរស័ក្កិតាមអ្វីដែលអាចធ្វើទៅបាន ៕
ចំនួនអ្នកទស្សនា
- ថ្ងៃនេះ2381
- ម្សិលមិញ4001
- សប្តាហ៍នេះ19971
- ខែនេះ214571
- ឆ្នាំនេះ214571
- សរុប20657027