ខៀវ កាញារីទ្ធ ចង់មកធ្វើជាអ្នកកាសែត ដើម្បីផ្ដល់នូវចំណេះដឹងក្នុងការសរសេរឱ្យមនុស្សយល់បានច្រើន
16-August-2017 | ដោយ ពល បញ្ញា
រដ្ឋមន្ដ្រីក្រសួងព័ត៌មានលើកឡើងថា ប្រសិនបើខ្ញុំសរសេរកាសែត មួយមាន មនុស្ស១០០នាក់យល់ ហើយ១០០នាក់ហ្នឹងទៅពន្យល់ដល់មនុស្ស១០០នាក់ទៀតអាចធ្វើ ឱ្យមនុស្សយល់បានកាន់តែច្រើន។ នេះគឺជាការអះអាងរបស់ឯកឧត្តម ខៀវ កាញារីទ្ធ រដ្ឋមន្ដ្រីក្រសួងព័ត៌មាន ក្នុងការទទួលសៀវភៅចំនួន២២២ក្បាល ស្ដីពី ខៀវ កាញារីទ្ធ ជីវិតក្នុងសមរភូមិទស្សនៈចម្រុះពណ៌ កាលពីថ្ងៃទី១៥ ខែសីហា ឆ្នាំ២០១៧ នៅទីស្ដីការក្រសួងព័ត៌មាន។
ឯកឧត្តម ខៀវ កាញារីទ្ធ រដ្ឋមន្ដ្រីក្រសួងព័ត៌មាន បានមានប្រសាសន៍ថា ពេលបញ្ចប់ការសិក្សាផ្នែកការទូត ខ្ញុំមកធ្វើការងារនៅក្រសួងការបរទេស ដើម្បីឱ្យត្រូវនឹងមុខជំនាញ របស់ខ្ញុំ ប៉ុន្ដែបានឃើញ អ្នករៀនពូកែ ច្រើនចូលធ្វើការងារខាងទូត ហើយអ្នករៀនខាង ការទូតនៅជំនាន់មុនខ្ញុំ ពេលធ្វើការងារនៅក្រសួង ការបរទេស១០ឆ្នាំក្រោយមក ត្រូវទៅធ្វើ ជាឯកអគ្គរាជទូតនៅក្រៅប្រទេស។
ឯកឧត្តមបានបញ្ជាក់ថា ប៉ុន្ដែអ្នកនៅក្នុងស្រុកវិញ បើទោះបីរៀនមិនបានពូកែក្ដីប៉ុន្ដែ១០ឆ្នាំ ទៅ២០ឆ្នាំក្រោយ ពួកគេបានក្លាយទៅជាចៅហ្វាយស្រុក ចៅហា្វយខេត្ដ និងធ្វើ ជារដ្ឋមន្ដ្រី ព្រមទាំងអាចជួយដល់សង្គម បានច្រើនជាងធ្វើជាអគ្គរាជទូត។
ឯកឧត្តមបានអះអាងថា “ដោយមើលឃើញអំពីបញ្ហាទាំងអស់ខាងលើនេះហើយខ្ញុំអត់ចង់ ធ្វើជាឯកអគ្គរាជ ទូតនោះទេ ហើយក្រោយពីឆ្នាំ១៩៧៩ ខណៈដែលខ្ញុំ ធ្វើជាអ្នកកាសែត ខ្ញុំគិតថា ក្នុងសម័យប៉ុល ពតយើងឃើញថា និងចោទប៉ុលពតជា អ្នកសម្លាប់ តាមពិតអ្នកណាជាអ្នកសម្លាប់ខ្មែរ គឺខ្មែរខ្លួនឯងនោះទេ ហើយហេតុអ្វីបានជា គេសម្លាប់បានគឺដោយសារតែការយល់ដឹង។ ការមិនចេះ មិនយល់ដឹង និងអវិជ្ជានេះហើយ បានធ្វើឱ្យមនុស្សយើងអត់ខ្លាចញញើតលើកដៃសម្លាប់មនុស្សដូច គ្នានោះទេ”។
ឯកឧត្តមរដ្ឋមន្ដ្រីបានបន្ថែមថា “ខ្ញុំគិតថា បើខ្ញុំនៅសរសេរកាសែត ខ្ញុំអាចផ្ដល់នូវ ចំណេះដឹងដល់មនុស្ស ច្រើនជាងខ្ញុំធ្វើជាមន្ដ្រីការទូត ឬឯកអគ្គរាជទូត និងបានជួយទប់ ស្កាត់អំពើប្រល័យពូជសាសន៍វិលត្រឡប់មកវិញ”។
ឯកឧត្តមបានចាត់ទុកថា ការចងក្រង ឬការសរសេរសៀវភៅ គឺជាការផ្សព្វផ្សាយនូវគំនិតមនុស្សរៀងៗខ្លួននិងម្នាក់ៗ សម្រាប់ ជួយផ្ដល់នូវចំណេះដឹងដល់ប្រជាជនគ្រប់រូប សម្រាប់ធ្វើការពិចារណាដល់យុវជនជំនាន់ ក្រោយផងដែរ៕
ចំនួនអ្នកទស្សនា
- ថ្ងៃនេះ2171
- ម្សិលមិញ4001
- សប្តាហ៍នេះ19761
- ខែនេះ214361
- ឆ្នាំនេះ214361
- សរុប20656817