ឈ្មួញឈើគ្រញូងឈ្មោះ ចែកាន់យ៉ា ល្បីល្បាញខ្លាំងគ្មានសមត្ថកិច្ចហ៊ានបង្ក្រាប
19-August-2017 | ដោយ ពល បញ្ញា
ឧត្តរមានជ័យ ៖ ឈ្មោះ ចែកាន់យ៉ា ឈ្មួញឈើគ្រញូង ដែលល្បីថា មន្ត្រីយោធានៅពីក្រោយខ្នង នៅតែបន្តធ្វើសកម្មភាពប្រមូលទិញឈើ នៅក្នុងភូមិសាស្ត្រអូរស្វាយ ស្រុកត្រពាំងប្រាសាទ និងកំពុងកៀរគរប្រជាពលរដ្ឋឆ្លងដែនចូលទឹកថៃ រកកាប់ឈើគ្រញូង ក្រោមការរៀបចំ និងបើកភ្លើងខៀវពីមន្ត្រីយោធាផ្នែកសឹករងស្រុកត្រពាំងប្រាសាទ ។
ឈ្មួញឈើគ្រញូង គេតែងតែហៅថា ចែកាន់យ៉ា រូបនេះ អាចនិយាយបានថា ជាឈ្មួញឈើគ្រញូងដុះស្លែរមួយរូប មិនមានអ្នកបង្ក្រាប កាលពីមុនឈ្មួញរូបនេះ បានប្រមូលទិញឈើគ្រញូងពីតំបន់អូរស្វាយ ដឹកទៅស្តុកទុក នៅផ្ទះចំណុច ៩៨០ ស្ថិតនៅក្រោយប៉ុស្តិ៍នគរបាលរដ្ឋបាលឃុំអន្លង់វែង ស្រុកអន្លង់វែង ខេត្តឧត្តរមានជ័យ ។
បច្ចុប្បន្ន ឈ្មួញរូបនេះ បានដឹកឈើគ្រញូងទៅដាក់ផ្ទះរបស់មួយកន្លែង នៅចំណុចភូមិពាមក្នុង ឃុំអូរស្វាយ ស្រុកត្រពាំងប្រាសាទ ឬក៏ដឹកយកទៅលាក់នៅ ស្រុកត្រពាំងប្រាសាទ។ជាក់ស្តែងនៅអំឡុងវេលាម៉ោង៩យប់ថ្ងៃទី១៨ សីហា ឆ្នាំ២០១៧ មានរទេះគោមួយ ដែលកំពុងដឹកឈើគ្រញូងពេញមួយរទេះ ចេញពីចំណុចទឹកជប់ ពើយតារួន ខ្នងភ្នំដងរែក ដែលអ្នកបររទេះបាននិយាយថា ឈើគ្រញូងមានថៅឈ្មោះ ចែកាន់យ៉ា ។
អ្នកបររទេះនោះ បាននិយាយទៀតថា ចែកាន់យ៉ា ដឹកឈើគ្រញូងចេញពីចំណុចព្រំដែកម្ពុជា-ថៃ បានយ៉ាងរលូន ក៏មានការរៀបចំការពារពីសំណាក់មន្ត្រីយោធាផ្នែកសឹករងស្រុកត្រពាំង ប្រាសាទ បើពុំនោះទេ កុំថាឡើយ តែឈើគ្រញូងមួយដុំតូច ឬកម្លាំងឡើងភ្នំម្នាក់ ច្បាស់ណាស់ ប្រាកដជាត្រូវកម្លាំងផ្នែកសឹករងស្រុកត្រពាំងប្រាសាទចាប់គ្មានចន្លោះនោះឡើយ ។
ពាក់ព័ន្ធករណីខាងលើ អ្នកយកព័ត៌មានយើងមិនអាចទំនាក់ទំនង មេបញ្ជាការផ្នែកសឹក រងស្រុកត្រពាំងប្រសាទបានទេ នៅព្រឹកថ្ងៃទី១៩ ខែសីហា ឆ្នាំ២០១៧នេះ ៕
ចំនួនអ្នកទស្សនា
- ថ្ងៃនេះ1601
- ម្សិលមិញ4001
- សប្តាហ៍នេះ19191
- ខែនេះ213791
- ឆ្នាំនេះ213791
- សរុប20656247