បុណ្យឯករាជ្យជាតិ ៩ វិច្ឆិកា ២០១៩ ប្រព្រឹត្តទៅប្រកបដោយក្តីរំភើបក្រៃលែង ក្រោមព្រះរាជាធិបតីភាពព្រះបរមនាថ នរោត្តម សីហមុនី ព្រះមហាក្សត្រកម្ពុជា

09-November-2019 | ដោយ ពល បញ្ញា

រាជធានីភ្នំពេញ ៖ ព្រឹកនេះ (ថ្ងៃទី៩ វិច្ឆិកា ២០១៩) ព្រះរាជាណាចក្រកម្ពុជាទាំងមូលបានប្រារព្ធពិធីរំលឹកខួបអនុស្សាវរីយ៍លើកទី៦៦ បុណ្យឯករាជ្យជាតិ នៅស្តូបវិមានឯករាជ្យ រាជធានីភ្នំពេញ ពិធីបុណ្យឯករាជ្យជាតិបានប្រារព្ធឡើងប្រកបដោយភាពអធិកអធមក្រៃលែង ក្រោមព្រះរាជាធិបតីភាពព្រះបរមនាថ នរោត្តម សីហមុនី ព្រះមហាក្សត្រកម្ពុជា អមដោយឥស្សរជនមន្ត្រីជាន់ខ្ពស់រាជរដ្ឋាភិបាលជាច្រើនរូបទៀត ។

អមដំណើរព្រះមហាក្សត្រនរោត្តម សីហមុនី យាងបំពាក់កម្រងផ្កា ប្រទានភ្លើងជ័យ និងគោរពវិញ្ញាណក្ខន្ធដល់វីរបុរសស្នេហាជាតិ ដែលបានពលិកម្មក្នុងបុព្វហតុ ដើម្បីឯករាជ្យជាតិ បូរណភាពទឹកដី និងការអភិវឌ្ឍន៍នោះ មាន សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រី សម្តេចអគ្គមហាពញាចក្រីហេង សំរិន ប្រធានរដ្ឋសភា សម្តេច វិបុលសេនាភក្តី សាយ ឈុំ ប្រធានព្រឹទ្ធសភា ព្រមទាំងឧបនាយករដ្ឋមន្ត្រី ទេសរដ្ឋមន្ត្រី រដ្ឋមន្ត្រី និងនាយឧត្តមសេនីយ៍ ឧត្តមសេនីយ៍ជាច្រើនរូប ។

ពិធីបុណ្យឯករាជ្យជាតិលើកទី៦៦ ថ្ងៃទី៩ វិច្ឆិកា ២០១៩ បានប្រព្រឹត្តទៅក្រោមបរិយាកាសរីករាយរំភើបក្រៃលែងពីសំណាក់ឧត្តមមន្ត្រី អស់លោក លោកស្រី មន្ត្រីរាជការ កងកំលាំងប្រដាប់អាវុធ និស្សិត សិស្សានុសិស្ស និងប្រជាពលរដ្ឋទូទាំងប្រទេស បន្ទាប់ពីអាណាព្យាបាលបារាំងបានប្រគល់ឯករាជ្យជាតិ អធិបតេយ្យភាព និងបូរណភាពទឹកដីថ្វាយព្រះមហាវីរក្សត្រព្រះបាទ នរោត្តម សីហនុ កាលពីថ្ងៃទី៩ វិច្ឆិកា ១៩៥៣ ហើយតាំងពីពេលនោះមក កម្ពុជាមានសិទ្ធិស្មើភាពគ្នាចំពោះមុខប្រទេសនានា ដែលមានឯករាជ្យភាពលើពិភពលោក និងមានសិទ្ធិប្រឡូកលើឆាកអន្តរជាតិយ៉ាងស្វាហាប់ ជាពិសេសការដឹកនាំ ការអភិវឌ្ឍន៍គឺដំណើរការប្រកបដោយឆន្ទៈខ្លួនឯង គ្មានបណ្តាប្រទេសណាមកជ្រៀតជ្រែកបានឡើយ ៕ដោយ លាង ម៉េងឡា