​ខ្សែប្រយុទ្ធ Olivier Giroud និង​ខ្សែបម្រើ Mesut Ozil បាន​ស៊ុត​បាល់​បញ្ចូល​ទី​នៅ​ជិត​បញ្ចប់​ការប្រកួត ខណៈដែល Arsenal បានផ្តល់​ក្តីសង្ឃឹម​នៃ​ក្របខ័ណ្ឌ Champions League ដល់​ពួកគេ​ផ្ទាល់​ជាមួយនឹង​ការទទួល​ជ័យជម្នះ​យ៉ាង​កក់ក្តៅ​ក្នុង​លទ្ធផល ២-០ លើ​ក្រុម Bayern Munich នៅ​កីឡដ្ឋាន Emirates កាលពី​ថ្ងៃ​អង្គារ​។

​នៅ​ខណៈនោះ​ផងដែរ ក្រុម Chelsea ត្រឹមតែ​អាច​បញ្ចប់​ក្នុង​លទ្ធផល​ស្មើ ០-០ នៅលើ​ទឹកដី​ក្រុម Dynamo Kiev ប៉ុន្តែ ក្រុម​ម្ចាស់​ជើងឯក​ទ្វីបអឺរ៉ុប Barcelona បានទទួល​ជ័យជម្នះ​ក្នុងប្រទេស​បេឡា​រុស ក្នុង​លទ្ធផល ២-០ ហើយ​ក្រុម Bayer Leverkusen បានបញ្ចប់​ក្នុង​លទ្ធផល​ស្មើ ៤-៤ ជាមួយនឹង​ក្រុម Roma នៅ​ប្រទេស​អាល្លឺម៉ង់​។​

Bayern បាន​ទៅដល់​ទីក្រុង​ឡុង​ដ៍ ក្រោយពី​ឈ្នះ​រាល់​ការប្រកួត​ទាំងអស់​ក្នុង​រដូវ​កាល ហើយ​ពួកគេ​បាន​គ្រប់គ្រង​បាល់​ស្ទើរតែ​ទាំងស្រុង​ក្នុងការ​ប្រកួត​ពូ​ល F ដ៏​រំភើប​មួយ​។ ប៉ុន្តែ ទោះបីជា​យ៉ាងណា ពួកគេ​នៅតែ​ស្ថិតក្នុង​លទ្ធផល​ស្មើ​នៅត្រឹម​តង់​ទី​១ ក្រោយពី​អ្នកចាំទី Manuel Neuer បាន​សង្គ្រោះ​បាល់​យ៉ាង​ល្អ​ពី​ការ​ស៊ុត​បាល់​ពី​សំណាក់​របស់​ខ្សែប្រយុទ្ធ Theo Walcott ។

​លោក Arsene Wenger អ្នកចាត់ការ​ទូទៅ​រប​ស់​ក្រុម Arsenal បាន​ឲ្យ​ដឹងថា​៖ «​យើង​មាន​ភាពចាំបាច់​មួយ​ដើម្បី​ឈ្នះ​ការប្រកួត​នេះ ហើយ​យើង​បានធ្វើ​វា​ក្នុង​មធ្យោបាយ​ដ៏​មាន​វិន័យ​មួយ​។ Bayern បាន​គ្រប់គ្រង​បាល់​ច្រើនជាង​យើង ប៉ុន្តែ យើង​បាន​សម្រេចចិត្ត​ធ្វើ​ឲ្យ​វា​មាន​ភាពស្វិតស្វាញ និង​វាយ​សម្រុក​ពួកគេ​នៅ​ជិត​បញ្ចប់​ការប្រកួត​»៕

​ប្រភព​៖ Channel News Asia , cambosport

​