Sergio Aguero បាន​បង្ហោះ​រូបថត selfies មួយ​សន្លឹក​ជាមួយ​ប្រធានាធិបតី​ចិន ស៊ី ជីន​ពីង និង​នាយករដ្ឋមន្ត្រី​អង់គ្លេស David Cameron នៅ​ទីលាន​ហ្វឹកហាត់​របស់​ក្រុម Manchester City ដែល​បង្ក​ជា​ចម្ងល់​កាន់តែខ្លាំង​ថា ថ្នាក់ដឹកនាំ​កំពូល​២​នាក់​នេះ​ជា​អ្នកគាំទ្រ​របស់​មេឃ​ខៀវ​ឬ​យ៉ាងណា​។​

​ប្រធានាធិបតី​ចិន ស៊ី ជីន​ពីង បាន​ផ្តើមធ្វើ​ទស្សនកិច្ច​រយៈពេល​៤​ថ្ងៃ នៅ​ប្រទេស​អង់គ្លេស​តាំងពី​ថ្ងៃ​អង្គារ​ទី​២០​តុលា ហើយ​រហូតដល់​ម្សិលមិញ​នេះ លោក និង នាយករដ្ឋមន្ត្រី​អង់គ្លេស​បានធ្វើ​ដំណើរ​ទៅ​មើល​ការហ្វឹកហាត់​របស់​ក្រុម Man City ផ្ទាល់​។

​ការធ្វើដំណើរ​ទៅនេះ​ដែរ គឺ​អមដោយ​អតីត​កីឡាករ​ចិន​ម្នាក់​ឈ្មោះ Sun Jihai ដែល​ធ្លាប់​លេង​នៅ​ទីនោះ​និង​ជា​កីឡាករ​ចិន​ដំបូង​គេ​ដែល​រក​គ្រាប់​បាល់ បាន​នៅ​លី​ក​កំពូល​អង់គ្លេស​។ ក្នុងឱកាស​នោះដែរ  Aguero បាន​សុំ​បុរស​ខ្លាំង​ទាំងពីរ​ថតរូប​ជុំគ្នា​មួយ​សន្លឹក ហើយ​បង្ហោះ​តាម​បណ្ដាញ​សង្គម​នានា ទើប​ធ្វើឱ្យមាន​ការភ្ញាក់ផ្អើល​ជាខ្លាំង​តែម្ដង​។​
 
​គ្មាន​ប្រភព​ច្បាស់ការ​ណាមួយ បាន​ចេញមក​បញ្ជាក់ថា​ប្រធានាធិបតី​ចិន​ខាងលើ​ជា​អ្នកគាំទ្រ Man City នោះទេ ប៉ុន្តែ​អ្នក​ដែល​ស្និទ្ធ​នឹង​លោក​បាន​បញ្ជាក់ថា បុរស​ខ្លាំង​នៅ​អាស៊ី​រូបនេះ​ចូលចិត្ត​មើល​ក្រុម​មេឃ​ខៀវ​ជាងគេ​នៅ អង់គ្លេស​។​

​ក្រោយពី​ចូល​មើល​ក្រុម Man City ហើយ លោក ស៊ី ជីន​ពីង និង Cameron ក៏​ចូលទៅ​មើល​សារមន្ទីរ​បាល់ទាត់​ផងដែរ ដើម្បី​ទៅ​មើល​បាល់​ដំបូង​គេ ដែល​ប្រើ​ក្នុងការ​ប្រកួត​បាន​រង្វាន់ World Cup ៕

​ប្រភព​៖ dailymail , sabay
​