​ខ្សែប្រយុទ្ធ Diego Costa  របស់​ក្រុម Chelsea ត្រូវបាន​បញ្ជូន​ទៅកាន់​មន្ទីរពេទ្យ ក្រោយពី​បាន​រងរបួស​ឆ្អឹងជំនីរ អំឡុងពេល​ក្រុម​ម្ចាស់​ការពារ​តំណែង​ជើងឯក​មួយ​នេះ បាន​រង​បរាជ័យ​ក្នុង ការប្រកួត​ពាន League Cup ដោយ​ការ​ស៊ុត​បាល់​ប៉េ​ណា​ល់​ទី នៅលើ​ទឹកដី​ក្រុម Stoke City កាលពី​ថ្ងៃ​អង្គារ​។

​នេះ​បើ​យោងទៅតាម​ការបញ្ជាក់រ​ប​ស់លោក Jose Mourinho ដែលជា​អ្នកចាត់ការ​ទូទៅ​។ ខ្សែប្រយុទ្ធ​អន្តរជាតិ​អេ​ស្ប៉ា​ញ​ដើមកំណើត​ប្រេ​ស៊ី​ល​រូបនេះ ហាក់ដូចជា​ធ្វើ​ឲ្យ​រងរបួស​ខ្លួនឯង​ក្នុងការ​ប៉ះទង្គិច​មួយ ជាមួយនឹង​អ្នកចាំទី Jack Butland របស់​ក្រុម Stoke ហើយ​ក្រោយពី​ការលេង​បាន​បន្តិច រូបគេ​ត្រូវបាន​ប្តូរ​ចេញ​នៅ​នាទី ទី​៣៣ ខណៈដែល​ខ្សែប្រយុទ្ធ Loic Remy ជា​អ្នក​ចូល​ជំនួស​កន្លែង​របស់គេ​។​

​នៅពេល​ត្រូវបាន​ចោទសួរ ពី​កម្រិត​ដែល Costa បាន​រងរបួស លោក Mourinho បាន​ឆ្លើយថា​៖ «​ខ្ញុំ​មិនដឹង​ទេ​។ ខ្ញុំ​គិតថា រូបគេ​បាន​ដាល់​ខ្លួនឯង​»​។ Chelsea បាន​រង​បរាជ័យ​ក្នុង​លទ្ធផល ៥-៤ ដោយ​បាល់​ប៉េ​ណា​ល់​ទី ខណៈដែល Butland បាន​សង្គ្រោះ​ការ​ស៊ុត​បាល់​កាត់សេចក្តី​មួយ​ពី​សំណាក់​ខ្សែបម្រើ Eden Hazard ក្រោយពី​ការប្រកួត​នេះ​បានបញ្ចប់​ក្នុង​លទ្ធផល​ស្មើ ១-១ ក្នុង​ម៉ោង​ធម្មតា​។

Costa វ័យ​២៧​ឆ្នាំ គឺជា​អ្នករក​គ្រាប់​បាល់​បាន​ច្រើនជាងគេ​របស់ Chelsea កាលពី​រដូវ​កាល​មុន​ជាមួយនឹង​ការរកបាន​២១​គ្រាប់​ក្នុង​យុទ្ធនាការ លើក​ទី​១​របស់គេ ក្រោយពី​ផ្ទេរ​មកពី​ក្លិប Atletico Madrid ប៉ុន្តែ បាន​ស៊ុត​បាល់​បញ្ចូល​ទី​ត្រឹមតែ ៣​គ្រាប់​គត់​ក្នុង​រាល់​ការប្រកួត​ទាំងអស់​នៅ​រដូវ​កាល​នេះ​៕

​ប្រភព​៖ Channel News Asia , cambosport

​