ជំងឺ៧ មុខ ដែលមនុស្សស្រីងាយនឹងកើតជាងមនុស្សប្រុស
30-November-2015 | ដោយ មួយឡា
ពេលខ្លះមនុស្សស្រីជាច្រើនគិតថា ធម្មជាតិ មិនយុត្តិធម៌ ចំពោះរូបគេឡើយ។ មនុស្សស្រី ងាយនឹងកើតជំងឺ ៧ មុខ ច្រើនជាងមនុស្សប្រុស ដូចជា ជំងឺចាស់វង្វេង ជំងឺដាច់សរសៃឈាមខួរក្បាល ជំងឺក្រពេញទីរ៉ូអ៊ីត។ល។
ដូចអ្នកដឹងហើយថា ក៏មានជំងឺជាច្រើនទៀត ដែលឧស្សាហ៍កើតលើមនុស្សស្រី ជាងមនុស្សប្រុសដែរ ដូចជា ជំងឺមហារីកសុដន់ និងជំងឺពុកឆ្អឹងជាដើម។
ជំងឺក្រពេញទីរ៉ូអ៊ីត
អ្នកប្រហែលជាឧស្សាហ៍ឃើញ ស្ត្រីវ័យចំណាស់ៗ ដែលមានស្នាមវះនៅត្រង់ក នោះហើយគឺជាការវះកាត់ក្រពេញទីរ៉ូអ៊ីត។ យោងទៅតាមសមាគមន៍ ជំងឺក្រពេញទីរ៉ូអ៊ីតអាមេរិច (American Thyroid Association) បានឲ្យដឹងថា ស្ត្រីប្រមាណជា ១២ ឬ ១៣ ភាគរយ នឹងទទួលរងផលប៉ះពាល់ នៃជំងឺនេះ នៅថ្ងៃណាមួយជាមិនខាន ហើយស្ត្រីមានឱកាសកើតជំងឺនេះ ៧ ដងលើសបុរសៗ។
ជំងឺលើសឈាម
"ជំងឺបេះដូង គឺជាឃាតករនាំមុខគេ ចំពោះមនុស្សស្រី" នេះបើតាមប្រសាសន៍របស់វេជ្ជបណ្ឌិត Goldberg។ ហើយស្ត្រីម្នាក់ក្នុងចំណោមប្រាំនាក់ បានដឹងខ្លួនឯងថា រូបគេកំពុងប្រឈមមុខនឹងជំងឺមួយនេះ។ ស្ត្រីជនជាតិអាមេរិច ៤ ក្នុងចំណោម ៥ នាក់ កំពុងលើសឈាម ហើយមនុស្សប្រុសវិញគឺ ២ ក្នុងចំណោម ៣ ប៉ុណ្ណោះ។
ជំងឺដាច់សរសៃឈាមខួរក្បាល
ក្រោមអាយុ ៧៥ ឆ្នាំ មនុស្សប្រុស កើតជំងឺដាច់សរសៃឈាមខួរក្បាល ច្រើនជាងមនុស្សស្រី ប៉ុន្តែ ចាប់ពីអាយុ ៧៥ ទៅ ៨៥ វិញ គឺមនុស្សស្រីច្រើនជាងហើយ។ បន្ទាប់មក ចាប់ពីអាយុ ៨៥ ឆ្នាំឡើងទៅ ស្ត្រីកើតជំងឺនេះ ច្រើនជាងបុរសឆ្ងាយណាស់ រហូតក្លាយជាឃាតករលំដាប់ថ្នាក់ទី ៤ នៃអត្រាមរណៈភាពរបស់ស្ត្រី នៅសហរដ្ឋអាមេរិច។
ជំងឺចាស់វង្វេង
ជំងឺនេះ កើតច្រើនបំផុត លើស្ត្រីចាស់ជរា។ ក្នុងឆ្នាំ ២០១៣ ជំងឺចាស់វង្វេង បានសម្លាប់ស្ត្រីប្រហែលជា ៥៩.០០០ នាក់ បើធៀបទៅមនុស្សប្រុស គឺមានតែ ២៦.០០០ នាក់ប៉ុណ្ណោះ។
ជំងឺឈឺក្បាលប្រកាំង
បើមនុស្សប្រុសម្នាក់ ឈឺក្បាលដោយប្រកាំង នោះមនុស្សស្រី ៣ នាក់ឯណោះកើតជំងឺនេះ។ ការផ្លាស់ប្តូរអ័រម៉ូន អាចទាក់ទងនឹងបញ្ហានេះ ប៉ុន្តែ មូលហេតុពិតប្រាកដ នៃការឈឺចាប់ មិនត្រូវបានគេដឹងនោះទេ។
ជំងឺប្រព័ន្ធការពាររាងកាយ
"ជំងឺប្រព័ន្ធការពាររាងកាយ" គឺជាឆ័ត្រមួយ ដែលគ្របដណ្តប់ទៅដោយ ជំងឺរ៉ាំរ៉ៃច្រើនជាង ១០០ មុខ ដូចជា ជំងឺរលាកសន្លាក់ និងជំងឺក្រិនសរសៃឈាមជាដើម។ ស្ត្រីប្រហែលជា ៧៥ ភាគរយនឹងអាចជួបបញ្ហានេះ។
ជំងឺក្រួសក្នុងប្រមាត់
ជំងឺនេះ កើតឡើងដោយសារតែ ភាគល្អិតៗដែលកកផ្តុំគ្នា នៅក្នុងប្រមាត់។ ស្ត្រីមានផ្ទៃពោះ និងស្ត្រីអាយុលើសពី ៤០ ឆ្នាំ ច្រើនកើតជំងឺនេះ ហើយស្ត្រីប្រហែលជាពាក់កណ្តាល ត្រូវបានគេប៉ាន់ស្មានថា នឹងកើតជំងឺនេះ ចន្លោះអាយុ ៧៥ ឆ្នាំ បើធៀបទៅនឹងបុរស គឺមានតែ ២០ ភាគរយប៉ុណ្ណោះ៕
ប្រភព៖ health
ចំនួនអ្នកទស្សនា
- ថ្ងៃនេះ12351
- ម្សិលមិញ12561
- សប្តាហ៍នេះ40301
- ខែនេះ62181
- ឆ្នាំនេះ62181
- សរុប20504637