ប្រើ​ថ្នាំ​ផ្សះ​ច្រើន​អាច​នាំឱ្យ​ក្មេង​តូច​ប្រឈម​នឹង​ជំងឺ​ទឹកនោមផ្អែម​

03-July-2016 | ដោយ មែន កំសត់


​ផ្អែក​តាម​ការសិក្សារ​ស្រាវជ្រាវ​មួយ​នៅ​ប្រទេស​ក្រិ​កបាន​បង្ហាញថា ការផ្តល់​ថ្នាំ​ផ្សះ​ច្រើន​ដល់​កូនក្មេង អាច​បណ្តាលឱ្យ​មានការ​ផ្លាស់ប្តូរ​មេតាបូលីស ហើយ​ធ្វើឱ្យ​ពួកគេ​ប្រឈម​នឹង​ជំងឺ​ទឹកនោមផ្អែម ។​
​វេជ្ជបណ្ឌិត Dr Chaikleia Stefanaki អ្នកស្រាវជ្រាវ​ខាង​ផ្នែក Pediatric Endocrinology នៅ​សាកលវិទ្យាល័យ​សុខាភិបាល​ក្រុង​អា​តែ​ន ប្រទេស​ក្រិ​ក បាន​ពន្យល់ថា ការប្រើប្រាស់​ថ្នាំ​ផ្សះ​កាន់តែច្រើន​ទៅលើ​កូនក្មេង​អាយុ​ក្រោម​៣ ឆ្នាំ នឹង​បន្ថយ​អត្ថប្រយោជន៍​សុខភាព​របស់​មីក្រុប​ក្នុង​ពោះវៀន ហើយ​ថែមទាំង​រំខាន​ដល់​ការ​ស្រូបយក​ក៏ដូចជា​ការធ្វើ​មេតាបូលីស​ទៅលើ សារធាតុចិញ្ចឹម​ទៀតផង ។ ហេតុផល​ទាំងនេះ អាច​នាំទៅរក​ការ​ប្រឈម​នឹង​ការកើត​ជំងឺ​ទឹកនោមផ្អែម​ប្រភេទ​២​ក្នុង ភាគរយ​មួយ​ខ្ពស់ ។​
​ការធ្វើ​វិភាគលាមក​របស់​បណ្តា​ក្មេង​ជំទង់​ដែលមាន​បញ្ហា​ប្រឈម​នឹង​ការ កើត​ជំងឺ​ទឹកនោមផ្អែម​ចំនួន​១០​នាក់ និង​ក្មេង​មាន​សុខភាព​ធម្មតា​ចំនួន​១៤​នាក់ ដែលមាន​អាយុ​ចន្លោះ​ពី​១២​ទៅ​១៧​ឆ្នាំ​បាន​រកឃើញថា ក្មេង​ជំទង់​ដែលមាន​បញ្ហា​ប្រឈម​នឹង​ការកើត​ជំងឺ​ទឹកនោមផ្អែម​ទាំង​១០ នាក់ គឺ​ធ្លាប់​ប្រើប្រាស់​ថ្នាំ​ផ្សះ​ប្រហែល​៣​ដង​ក្នុង​១​ឆ្នាំ កាលពី​ពួកគេ​មាន​អាយុ​៣​ឆ្នាំ​។ ការវិភាគ​បានបង្ហាញ​ទៀតថា ចំនួន​បាក់តេរី Ruminococcus ថយចុះ​ក្នុង​លាមក ហើយ​ដែល​បាក់តេរី​នេះ​ជា​បាក់តេរី​ល្អ ជួយផ្តល់​ផលប្រយោជន៍​ជាច្រើន​ដល់​បាក់តេរី​ល្អៗ​ផ្សេងទៀត​ក្នុង​ពោះវៀន ។ អ្នកវិទ្យាសាស្ត្រ​បាន​ប្រាប់ថា ការថយចុះ​នេះ នឹង​បង្កឱ្យមាន​ហានិភ័យ​កាន់តែ​ខ្ពស់​ក្នុងការ​ប្រឈម​នឹង​ការកើត​ជំងឺ ទឹកនោមផ្អែម ។​
​ដើម្បី​បញ្ចៀស​នូវ​ហានិភ័យ​ខាងដើម ក្រុម​អ្នកសិក្សា​បាន​ណែនាំ​ឱ្យ​ឪពុកម្តាយ​គ្រប់រូប​គួរផ្តល់​នូវ​អាហារ prebiotic (​អាហារ​ដែល​ល្អ​ដល់​ការលូតលាស់​នៃ​មីក្រុប​) និង probiotic (​ពពួក​អាហារ​ដែលមាន​មីក្រុប​មាន​ប្រយោជន៍​)​ចំពោះ​កូនៗ​របស់ខ្លួន ដ្បិត​អាហារ​ទាំងពីរ​ប្រភេទ​នេះ​អាចជួយ​ឱ្យមាន​លំនឹង​បាក់តេរី​ល្អ​ក្នុង ពោះវៀន ហើយ​បន្ថយ​នូវ​ឱកាស​កើត​ជំងឺ​ទឹកនោមផ្អែម​ដែល​បណ្តាលមកពី​ការប្រើប្រាស់ ថ្នាំ​ផ្សះ​ពី​វ័យក្មេង ៕

ចំនួនអ្នកទស្សនា

    19476547

  • ថ្ងៃនេះ2101
  • ម្សិលមិញ2971
  • សប្តាហ៍នេះ13251
  • ខែនេះ71691
  • ឆ្នាំនេះ249101
  • សរុប19476547