សស យ ក បង្ហាញពីការរៀបចំទស្សនីយភាពដ៏សំបូរបែប ក្នុងព្រឹត្តិការណ៍អង្គរសង្ក្រាន្ត ឆ្នាំ២០១៦
04-March-2016 | ដោយ មែន កំសត់
ភ្នំពេញ៖ សហភាព សហព័ន្ធ យុវជនកម្ពុជា (ស.ស.យ.ក) នៅថ្ងៃទី៣ ខែមីនា ឆ្នាំ ២០១៦នេះ បានរៀបចំសន្និសីទសារព័ត៌មានមួយ ដើម្បីបង្ហាញអំពីគ្រោងការសកម្មភាពនានា ក្នុងព្រឹត្តិការណ៍អង្គរសង្ក្រាន្ត ឆ្នាំ២០១៦ ដែលនឹងប្រព្រឹត្តិទៅនៅថ្ងៃទី១៣ដល់ ១៦ ខែមេសា ឆ្នាំ២០១៦ នាទឹកដីអង្គរ ខេត្តសៀមរាបដ៏រុងរឿង របស់កម្ពុជា។
បើយោងតាមសេចក្តីប្រកាសព័ត៌មានរបស់ ស.ស.យ.ក បានបញ្ជាក់ថា ព្រឹត្តិការណ៍អង្គរសង្ក្រាន្តឆ្នាំ២០១៦ មានរៀបចំទស្សនីយភាព ប្លែកៗ និងសំបូរបែប មិនចាញ់ព្រឹត្តិការណ៍អង្គរសង្ក្រាន្ត ឆ្នាំ២០១៥នោះឡើយ ដោយមានការប្រមូលផ្តុំគ្នាធ្វើនំបាយត្រៀប និងនំផ្លែអាយ ដែលត្រូវបានដាក់ឈ្មោះថា «បង្អែមនៃក្តីស្រឡាញ់»ដើម្បីចែកជូនបងប្អូនជនរួមជាតិទស្សនា។
ជាមួយគ្នានេះ ស.ស.យ.ក ក៏រៀបចំព្រឹត្តិការណ៍ជាច្រើនទៀតដូចជា កម្មវិធីទាញព្រ័ត្រមិត្តភាព លេងល្បែងប្រជាប្រិយប្រពៃណីខ្មែរ មហោស្របសិល្បៈបុរាណ ពិព័រណ៌សិប្បកម្ម និងវត្ថុអនុវស្សាវរីយ៍ ការប្រណាំងរទះគោ ក្របី និងកម្មវិធីកម្មវិធីដ៏ទាក់ទាញ មួយចំនួនទៀត។ពិសេសជាងនេះទៅទៀតនោះ ព្រឹត្តិការណ៍អង្គរសង្ក្រាន្ត ឆ្នាំ២០១៦ និងប្រារព្ធឡើងក្រោមវត្តមានសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ក្នុងពិធីបើកផងដែរ៕
ចំនួនអ្នកទស្សនា
- ថ្ងៃនេះ291
- ម្សិលមិញ3211
- សប្តាហ៍នេះ13321
- ខែនេះ6441
- ឆ្នាំនេះ342701
- សរុប19570147